Chelsea i vihet pas dy yjeve të Milanit

17:58 | 4 Mars 2025
D.H

Kualifikimi i Milanit në Ligën e Kampionëve për sezonin e ardhshëm, do të ishte goxha vendimtar për mbajtjten e yjeve të ekipit.

Klube si Chelsea i janë vënë pas, nëse dështon klubi italian për të siguruar garën më prestigjioze të klubeve në botë.

“Rossonerët” së fundmi pësuan humbjen e tretë radhazi në Serie A, dhe me ekipin në vendin e nëntë – 11 pikë larg vendit që të dërgon në Ligën e Kampionëve – duket e pamundur që Milani t’i kalojë pesë klubet para saj në 11 ndeshjet e ardhshme.

Sipas “Calciomercato”, Chelsea është goxha i interesuar për mesfushorin holandez të Milanit, Tijjani Reijnders – i cili së fundmi e nënshkruajti kontratën e re deri më 2030.

Gjiganti i Premierligës po ashtu ka treguar interesim edhe për Rafael Leaon, i cili konsiderohet si lojtari më i mundshëm për t’u larguar nga “San Siro” gjatë kësaj vere.

Chelsea e Milani kanë një marrëdhënie të mirë mes klubeve, dhe klubi anglez po tenton të përfitojë nga kjo.